|
 |
序
對於今次於變靚D減肥的成績，我自覺驕傲。因為只是短短半年時間，我由211磅減至141磅，極速得連自己都難以置信。
很多人以為減肥又難、又辛苦、又「冇啖好食」，其實這些全是籍口。我於變靚D減肥成功，你都一樣可以。在本書中，我除了和大家分享我的減肥心得，還會教大家煮好味、健康、色香味俱全的早、午、晚餐和湯水，讓大家減肥也可以減得開心。
最後，我要多謝變靚D、老公、家人及所有支持我的朋友，陪我輕鬆愉快地度過這個減肥之旅。最後還要多謝《嘉出版》為我推出這本《肥媽極速瘦身天書》，使我能夠和大家分享我修身成果。
|
|
| 返回Menu |
| |
|
 |
近年纖體公司愈開愈多，更請來多位明星任代言人，由早期的鍾麗緹、劉嘉玲到近期的關芝琳、張柏芝等，都是美女一族，雖然養眼，但說服力欠奉。隨之而來的盧苑菌、陳秀珠及程可為亦算驚為天人，但總不及肥媽來得震撼。
肥媽的肥胖形象深入民心，究竟肥媽為什麼突然開始減肥呢?
「從來都冇衝動同冇唸過減肥，幾廿歲人仲減肥啫！雖然有好多friend開纖體公司，個個都想搵我做代言人，但幫得一個又幫唔到第二個，所以就開價100萬福港幣)，一心諗住冇人會出到咁嘅價錢俾我減肥，就唔會得失任何一個friend。
點知真係有纖體公司出100萬俾我！嘩！100萬都有人出？但做人要有口齒，既然開得個價，有人出到，就要去做。我最怕俾人搣同捱餓，而變靚D負責人蕭先生話叫我放心，絕對唔使驚冇嘢食喎！就係咁，我就答應咗簽約啦！」
|
 |
薛家燕減肥後，電視劇監製認為她的形象失去了親切感，而要求她增肥，肥媽近年於有線電視主持的《肥媽私房菜》大受歡迎，肥媽不擔心形象問題嗎？家人沒有反對嗎？
「我當然最擔心就係肥媽嘅形象啦！有線啲人知道我減肥都第一時間話『嘩！阿媽妳唔好減啦！妳個節目係sell妳煮得一手好餸，減肥就冇啖好食，會影響個節目收視喎！』但係冇辦法，我已經簽咗約，我叫佢哋一係就俾番100萬我，如果唔係我都要減。其實我都係應承變靚D減70磅，即係去到141磅就會停，所以都唔會由肥媽變瘦媽嘅！
至於屋企人，最初個個都好反對我減肥，因為佢哋知我鍾意食嘢，驚我辛苦同捱唔住，但我話我應承咗人嘅嘢唔可以唔做，如果真係唔舒服，我一定會去睇醫生，最後佢哋見我係變靚D減肥後仲健康咗，所以都好放心。」
|
|
| 返回Menu |
| |
|
 |
211磅的煩惱
所有肥胖的人都會有不少煩惱與尷尬事，肥媽也不例外，畢竟是211磅的身軀，所要經歷的，並非一般人所能明白或了解。
怕坐電梯
「我最肥嗰時足足有220磅！話就話個個都知我係肥媽，但一般肥人遇到嘅尷尬事，我同樣會遇到！最簡單嘅，當然係行入人多嘅電梯！如果『咇』一聲，超重，我一樣會覺得尷尬，所以入親電梯都幾驚架！但人肥，又唔可以行樓梯，太辛苦喇！」
冷言冷語
「喺香港，我唔多敢行時裝店，有時經過，喺門口望下，都未掂啲衫，喲sales已經話：『冇妳size！』有一次行入間鋪，想買件衫俾個女，都未揀，個sales已經話：『最大碼唔啱你！加加大都唔啱你！』當時都幾唔開心。」
擔心身體健康
「我阿爸、阿媽同大佬都有血壓高問題，雖然我暫時都冇事，但人老咗，新陳代謝開始慢，遲早一定有問題。肥嘅時候，行多步路都好辛苦，可能負荷太重，對腳成日痛，又容易腳腫同抽筋，瞓覺都要用枕頭墊高對腳先瞓得舒服啲。」
|
 |
坐頭等亦辛苦
「我成日要坐飛機走埠登台，經濟客位一定唔使諗，邊度坐得落？就算坐頭等或者商務客位，都係好辛苦。張櫈雖然闊咗，坐喺度都算OK，但係食嘢嗰時真係好麻煩！張枱又鬼死咁低已經頂住晒，仲要彎低身食嘢，個胸同肚腩又頂住，食都食得辛苦過人。」
磨穿絲襪、襪襠
「肥人大部分都好怕熱，大汗疊細汗，特別辛苦，尤其係腋下、大脾同胸底特別多汗，加上俾啲肥肉夾住，經常互相磨擦，啲肉好容易起粒粒。特別係大脾內側嗰兩嚿肉，著絲襪時不停磨擦，話咁快就磨穿。就算著褲，都係著幾次就穿！」
一年365日都用衛生巾
「之前個啲都未算係最麻煩、最尷尬，其實好多人唔知，肥得滯，打噴嚏嘅時候，啲脂肪頂住會控制唔到膀肛，令到有啲尿咇出嚟，所以我一年365日都用衛生巾，同埋打噴嚏之前蹺定腳，唔想出現尷尬嘅場面。如果傷風感冒，我仲會帶多條底褲出街添呀！絕對唔係誇張！」
|
|
| 返回Menu |
| |
|
 |
180磅的刺激
減肥，從來都是一件艱辛的工作，既要節食，又要做運動，真是每磅亦有血有汗！但肥媽於變靚D減肥卻減得相當輕鬆，每餐都吃得飽飽，亦沒有劇烈的運動，不消兩個月便減去30磅的脂肪，本來應該非常興奮，但為什麼要去看心理醫生呢？
先看中西醫調理身體
「喺同變靚D簽合約之前，做咗一個body check(身體檢查)，睇吓我身體狀況係咪真係適合減肥。結果報告話我冇糖尿，但血壓低，真係有啲意外！ 簽咗約之後，變靚D安排咗我睇中、西醫。其實自己都好想去睇中醫，但一直冇時間，今次就開維他命丸俾我食，可以見到自己身體明顯健康咗。」
吃不完的減肥餐單
「身體好咗，就開始見營養師。我最擔心佢寫份餐單要我捱餓！點知佢同我講：『你放心，份餐單嘅份量，多到你食唔晒呀！』係真唔係呀？我睇咗份餐單，的確分量十足，有飯、有麵包、有粉，但以我嘅經驗睇，食咁多嘢，一定瘦唔到，但既然簽咗約，就點都要跟佢食啦！食咗幾日，發覺分量真係多到食唔晒！ |
 |
1個月減20磅
「我老公為咗支持我減肥，特登買咗個電子磅俾我。我跟住變靚D嘅餐單食咗一個禮拜，真係瘦咗2、3磅！我終於開始相信份餐單。之後嘅一個月，我都有跟據變靚D嘅餐單食嘢，重有去變靚D嘅美容院做機。 嘩！部機真係好神奇！又唔發熱、又唔著燈，好似冇乜嘢咁，我只係每日喺入面行30分鐘就得，真係好難相信佢有乜嘢用。但結果呢，真係work！1個月之後我瘦咗20磅，肌肉都結實咗，健康又好咗，人又精神咗！咁快就見效，當然好興奮，信心開始愈嚟愈強，所以走去變靚D問營養師攞一份可以減得再快啲嘅餐單。」
體重不變 開始失控
「呢份新嘅餐單份量比之前嗰份少好多，勉強可以飽肚，但效果就非常好，食咗一個禮拜就瘦咗10磅。真係好高興，我竟然可以喺個幾月減到180磅！ 呢個幾月我Keep住磅，每日平均都可以輕1-2磅，但突然間有一日發覺連續兩日1磅都冇減過，我開始有啲緊張，結果第三日開始淨係食生果，但依然都係1磅都減唔到。到第四日嘅夜晚，我終於都忍唔住，覺得減得咁辛苦為乜？於是開咗雪櫃，不停食、不停食。」
|
 |
首見心理醫生
「其實好多減肥嘅人都會有好大嘅壓力，情緒又會唔穩定，變靚D一開始都話俾我聽，如果有需要就可以去搵心理醫生。我當時嘅反應當然係：『黐線！我又唔係癲，睇咩心理醫生呀？』但因為我已經好多日冇減到磅，個人愈嚟愈炆憎，變靚D嘅老闆解釋每個減肥嘅人減到咁上下都會有一個過渡期，可能成個星期1磅都減唔到，建議我不如去見下心理醫生。
結果我都有去見心理醫生，我講俾佢知我嘅情況，佢話減得咁辛苦，不如唔好減。我話唔得，依家個個都知我減緊肥，點可以話唔減就唔減？醫生問我係咪為咗錢。當然唔係啦！我已經減咗10磅，已經完成咗份約嘅第一part，已經可以攞到部份嘅錢，但依家唔關錢事，係我應承過人，就一定要做，做人唔可以言而無信！
醫生同我講，減肥嘅人減到咁上下要抖一抖，可能有一個禮拜左右，無論你食得幾少，都減唔到磅，如果你愈炆憎，磅數就愈唔落，因為係賀爾蒙嘅問題。所以減肥嘅時候，心情一定要好，得閒就聽下歌，relax一下。」
|
 |
上了寶貴一課
「去變靚D見心理醫生，我都估唔到會同佢講咁多嘢，我發覺我係唔識對自己好，淨係識對人好。咁多年嚟都係為仔女、孫、老公、家人同朋友而活，覺得自己俾錢去扮靚、去減肥、去買靚衫著，都係唔啱，但如果係買俾人就係好。我咁多年嚟都唔停咁幫朋友解決問題，而因為面子，唔想人擔心自己，有問題都唔講出嚟。其實做人應該要為自己諗，唔可以淨係為人諗、唔好自視過高、唔好當自己係超人，先會生活得開心啲。見完心理醫生，就好似上咗寶貴嘅一課，唔知點解，講完之後心情好咗好多，磅數又開始慢慢減輕。直到減咗50磅，又係一個關口，體重又停止減輕，好彩今次我識得點調適自己，好快亦好容易又過咗呢關。」 |
|
| 返回Menu |
| |
|
 |
141磅的興奮
肥媽於變靚D嘅減肥成果，全世界都有目共睹。瘦了、漂亮了、健康了，當然興奮，但亦惹來不少人的冷言與妒忌。見慣風浪的肥媽當然一笑置之，處之泰然，更風騷的說：「冇辦法喎！我真係靚咗！」
時裝店掃貨
「200幾磅嘅時候，唔好話喺香港買衫，連行入時裝店睇吓都唔敢，依家咁fit，隨便去一間舖頭都可以買到衫，真係好興奮。試過有一次走入間時裝店入面，一口氣買咗50幾件衫！瘦咗70磅喎！以前啲衫邊度仲啱著呀？梗係要買過晒啲衫啦！」
第一次戴「無帶bra」
「瘦咗之後，最想做嘅嘢係著泳衣游水！三點式？梗係唔係啦！幾十歲人著三點式嚇死人咩？不過以前著泳衣去游水，都要著多件T恤遮住，游得唔暢快！
唔好話著泳衣，以前著衫都要專登揀啲多布啲嘅遮住啲肥肉。依家著背心都得啦！重可以戴無帶bra架！以前啲underwear一直都要喺外國買。瘦咗真係方便好多！」
|
 |
朋友變臉
「於變靚D減肥成功後，讚美嘅說話當然聽唔少，但負面聲音都一樣聽唔少。有一次去睇醫生，聽到有兩個女人喺我背後傾偈，其中一個話：『肥媽真係減咗好多喎！』另一個就話：『唓！欣宜減得仲多啦！』喂！大佬！欣宜得17歲咋！新陳代謝快我咁多，梗係減多啲啦！點可以將我哋兩個比較呀？
但最難聽嘅，其實係身邊朋友嘅說話。喺啱啱開始減肥嘅時候，個個都話：『係啦，係啦，阿媽妳咁肥，要減吓喇！』重話全力支持我添！點知瘦咗之後，佢哋就答：『唓！有錢想減幾多都得啦！Keep先難呀！』仲話我皮膚差晒、皺紋都現晒！哼！你自己睇吓嘞！我邊度有皺紋？皮膚都不知幾好呀。佢哋妒忌之嘛！我唔會唔開心喎！冇辦法，我真係『索』咗嘛！」
不能接受自己過瘦
「依家減到141磅，夠喇！我接受唔到自己太瘦。最緊要係身體好咗，健康咗！依家唔再節食，而係要學識飲食均衡。」
|
|
| 返回Menu |
| |
|
 |
1.告訴身邊的人你正在減肥
「減肥其實唔難，講俾朋友聽你減緊肥先最難！同朋友出街食飯，因為減緊肥，唔敢食煎炸同肥膩嘅食物，但朋友問：『你係咪減肥呀？』好多人都怕瘀，唔敢認，所以照食啲肥膩嘢，咁好難減到肥架！所以，要同身邊嘅人講你減緊肥，等佢哋支持同鼓勵你之餘，又唔會逼你食嘢。」
2.每天對著鏡說「我一定得！」
「好多肥人都唔敢照鏡，唔敢面對自己。當你一開始減肥嘅時候，就要學習每日對住塊鏡講嘢，即係要面對自己，同自己make a promise(嚟一個約定)，話俾自己聽『你一定得架』。減肥嘅時候最好屋企有塊全身鏡，每日花啲時間照鏡，當你見到自已愈嚟愈有自信。」
3.磅 – 減肥必備
「每個減肥嘅人屋企一定要有一個磅，你一定要每日磅一次，睇住體重變化，先知道自己的減肥方法有冇效。另外，當你見到自己一日輕過一日，嗰種開心同滿足嘅感覺會係一種推動力，鼓勵你繼續支持落去。」
|
 |
4. 改變「食得唔好嘥」的觀念
「有好多人都有呢個錯誤嘅觀念，特別係有細路嘅女人，好似我咁，無論喺屋企或出街食飯，見到啲仔女食剩嘢都會忍唔住幫佢哋食晒，覺得『食得唔好嘥』。其實咁諗係唔啱，食剩嘢倒落垃圾桶當然係嘥，但都係嘥一份，如果勉強食，就係嘥兩份。你食咗落肚，都會痾番出嚟啦！同倒落垃圾桶冇分別，都係嘥。另外，你食多咗嘢會變成多餘嘅脂肪，又要減肥，仲嘥！」
5. 學會SAY NO
「減肥嘅時候，無論同朋友或家人食飯，佢哋都會叫你食多啲嘢啦、試少少啦，或者同你講食少少唔會肥架。如果係煎炸或肥膩嘢，你一定要學識講『我唔食』，小心一發不可收拾，千年道行一朝喪！」
6. 保持心境開朗
「試過減肥嘅人都知，一開始嘅時候體重會下跌得好快，但進度會愈嚟愈慢，甚至會停頓，無論你食幾少嘢、做幾多運動都冇乜進展，心情當然會愈嚟愈煩燥。只要你明白呢個係身體嘅適應期，保持輕鬆，唔好俾咁多壓力自己，體重又會慢慢開始減輕。」
|
 |
7.做適量運動
「雖然節食減磅重要，但必須做適量嘅運動令瘦咗嘅身體結實而唔係鬆弛，但好多肥人都會俾籍口自己，話驚著住運動裝出街會俾人笑、俾人知道你減緊肥。其實唔好以為自己好注目，條街啲人唔會得閒理你！」
|
|
| 返回Menu |
| |
|
 |
1.避免飲冰凍飲品及果汁
「促進新陳代謝會幫助瘦身，但飲凍嘢會令新陳代謝減慢，變相阻礙咗減肥嘅進度。而果汁嘅糖份分含量非常高，飲一杯鮮搾果汁，重勁過你食幾個生果，所以凍嘢同果汁都係減肥大敵。」
2.必需食早餐
「就算係減肥，身體都需要能量去燒脂，所以食早餐係必要嘅事。另外，早餐同午餐都可以食得豐富啲：breakfast eat like a queen, lunch eat like a king, dinner eat like a beggar (即早餐食到好似女皇，午餐食到好似皇帝，但晚餐就要食好少、少到似乞丐咁)。」
3.上床前3小時不可進食 「呢樣嘢應該好多人知，臨訓前食嘢好易肥，唔好話食宵夜，就算晚餐都唔可以太夜食。」
4.少吃榴槤、芒果及西瓜
「唔好以為減肥嘅時候可以任食生果，其實有唔少生果都含極高嘅糖分，尤其係榴槤、芒果同西瓜等等，最好就唔好食。」
|
 |
5.壽司首選吞拿魚
「雖然減肥嘅時候可以食飯，但唔可以過量，所以壽司都唔可以食太多件，而三文魚就更加唔食得，要食嘅話就揀食脂肪含量較低嘅吞拿魚，但唔好係肥美嘅『拖羅』(吞拿魚腩)呀！」
6.不要刻薄自己
「好多人以為減肥乜都唔食得，就算食都只可以食埋啲唔好味嘅嘢，搞到好似好慘咁。但其實減肥節食都可以對自己好啲，好似我咁，平時食飯我一樣大魚大肉俾啲仔女同老公食，而我唔會刻薄自己，會煮燕窩俾自己食，雖然唔可以用冰糖或者椰汁，咪用代糖或者鹹燕窩囉！一樣食得好開心！
另外，如果你突然好想食某啲嘢，間唔中都可以俾自己食少少嘅，我都試過有一次好想食雪糕，咪買一杯，食幾羹囉，滿足到自己，令自己開心啲，又唔太過份。好過死忍死忍，忍到最後頂唔順就狂食，仲衰！得不償失！」
|
 |
7.出外用膳不用避
「好多減肥嘅人都鍾*此將自己收埋喺屋企，唔敢出街食飯，驚自己受唔住引誘，其實減肥都可以出街食飯，只要識揀一啲冇咁肥膩嘅食物就OK！例如去茶餐廳，雖然唔可以食多士，但可以食蛋治或腿治，甚至係公司三文治都得，但就要走牛油，同埋最好就烘底。另外可以食魚蛋或牛丸米，多菜走油，食海南雞飯咪去皮同轉白飯囉！一樣可以好好味！如果要陪朋友或同事飲茶，最好就唔好食點心喇，蝦餃燒賣好肥架！可以食灼菜、湯麵或者米粉，都可以食吓馬拉糕、蒸牛肉同菜肉包嘅！至於食中菜或者去飲，就一定要擺碗熱水係隔離，將啲餸浸落去一陣，隔走多餘嘅油份，但煎炸嘢就唔好食喇！」
8.選擇適合自己的減肥餐單
減肥餐單需根據個人喜好及飲食習慣安排，效果定必事半功倍，詳情可向變靚D營養師查詢。
**資料由”肥媽極速瘦身天書”提供
|
|
|
|
